​最多減千八! 5.5 吋大芒 LG G4 vs HTC One X9 劈到同價

LG 是跌價天王，大家都知，不過跌嘅係 G4 嘅話，大家又唔知揀好？最近有地方做緊細舖以外嘅最低價，比起發佈個陣，減左千八！減千八，之前版主講過，大舖係無可能做到 (按這裡知道原因)。剛剛遇著，唔跌無人買嘅 HTC，同樣有款 5.5 吋屏幕手機，跌到一樣價!  LG G4 與 HTC One X9，你會點揀？

數碼通網店 G4 最低價

係咁多間網絡商嘅網店，數碼通一直靠送一年「爆芒換新」做賣點，但真係好優惠嘅機價，就唔算有。呢期做緊兩部，HTC One M9 賣成三千幾蚊注定無人要，但 LG G4 做緊 $2698，呢個價比起大舖嘅 $2998 再平三舊水，加埋「爆芒換新」保險，首年爆左芒，你可以問 SmarTone 取回維修費，呢個優惠，絕對想得過。 注意嘅係，數碼通特價係 LG G4 單卡版，除了做唔到雙卡雙待外，中國大陸嘅 4G LTE 頻段只有 Band 40 (2300)，即係返大陸你，若果你用中國移動香港漫遊，只有係室內才收到 4G 訊號。版主睇過，可能個價唔算特別平，加上只係單卡版，幾款顏色都有貨，真係長賣長有。

Sun Mobile 搶先為 HTC 減價

另一款，剛剛同 LG G4 減到同價嘅係 HTC One X9。呢部機，點可以同 G4 比？我會問，點解唔可以？其實 HTC One X9 都係用上 5.5 吋大屏幕，解像度都有 Full HD。呢個比起 G4 嘅 2K 芒絕對有好處，因為 LG G4 是食電王好多網友都知，而之前 ePrice 嘅 HTC 測試員 Andrew 為 HTC One X9 作出嘅評測，HTC One X9 嘅電量，會比 G4 襟用！而 HTC One X9 也有 HTC 最了得嘅全金屬機身、Boomsound 前置大大聲喇叭、雙卡雙待中港 3G + 4G，仲係插晒兩個 SIM 槽都仲有 microSD 卡可用。HTC One X9 跟 HTC One A9 一樣，使用 Android 6.0 嘅 Sense 版本，以簡約為主，效能與跑分都提升了好多。而 HTC 嘅 Android 6.0 做到合拼記億卡功能，亦係 LG 手機做唔到。

網友，你點揀？

為了不讓多咀網友又話版主變相推介 HTC，咁我都要講一下 HTC One X9 係用上 MTK Helio X10 處理器，呢粒 CPU，網友一直認為是不適合打機之用，而 WiFi 接收亦可能有問題。不過跟 LG G4 一樣，行 32GB ROM 及 3GB RAM。而 LG G4 其實都已可升級至 Android 6.0 架啦。當然，LG G4 之前有死底板事件，就算香港 LG 幾低調，幾唔想理，網友都心知不妙。咁網友會否結果兩款都唔揀？版主覺得，二千幾蚊來講，呢兩款 5.5 吋大芒機都好不錯，死底板，睇運數？MTK CPU 唔穩定？大家博唔博？若果我要買大芒手機，我會。我呢一刻，只會揀大品牌，你呢？