網絡商清舊貨，Z5 即劈二千，是入手好時機?
無錯，今次要講的劈價對象是 Sony 的 Z5。版主 Lawrence 之前同大家提過，Z5 在大舖偷偷減多左一舊，由 $4398 減到去 $4298，其實唔係減左好多。至於細舖價又有無驚喜呢? 雙卡版的 Z5 最近在細舖的售價一樣企得好硬，賣 $3880 已經一段時間，不過版主今日行場時發現，單卡版的 Z5 再偷偷減多 $100，最新賣價為 $3780，呢個價錢抵唔抵玩呢?
除左大舖、細舖有減之外，今日在 SmarTone 網上商店上發現，原來 Z5 都出現了「超級優惠」，由原價的 $5698，一劈劈左二千，即賣緊 $3698，相比細舖仲要便宜，顏色方面有墨綠、櫻粉、金、黑、銀五種顏色選擇。唔知 Z5 呢個價，大家會唔會考慮入手呢?
▲ Z5 大舖前排再減多一舊，現時售價為 $4298。
▲ 細舖方面，無論係雙卡版抑或單卡版，售價都企硬左好耐。而單卡版的 Z5，今日就再減多一百，賣 $3780。
▲ 以為細舖都已經算平，勢估唔到，SmarTone 突然間殺出一個 Z5 的「超級優惠」，劈足二千，賣 $3698，網友是時候衝了嗎?
G5 減價效應! 舊代旗艦焗住減，大舖再劈二百，真係有 so?
除左 Sony 有減價消息之外，LG 一樣有! 眾所周知，LG 出名跌價快，正因為咁，所以即使 G5 開賣，就算有興趣都好，大家似乎都唔急住買。可能就係個個都抱住呢個心態，G5 大舖前陣子唯有逼住減價，賣 $4498。咁 G5 減得價，引來的連鎖效應係，舊代旗艦焗住減價，繼 V10、G3 Dual 大舖減價之後，今個星期終於輪到 G4。
LG G4 大舖 $3298 呢個價其實已經持續了一段時間，版主行場的時候，留意到百老匯將 LG G4 減多左 $200，即 $3098，送玻璃貼、16GB 卡以及 MHL 線。雖然豐澤目前仲係標價 $3298，不過一問店員，店員表示而家同百老匯一樣，都係賣緊 $3098，送玻璃貼以及外置充電器，比細舖的 $3180 還要便宜。不過，數字上係平左，但實際係咪真係有著數呢?
就大舖而言，其實百老匯、豐澤始終都不及衛訊咁抵玩。衛訊不單止一樣做緊「即減 $1400」的優惠，而且佢除左有送玻璃貼、32GB SD 卡之外，仲有送價值 $298 的電池套裝。多舊電，呢點係好重要的。網友覺得呢?
▲ 可以見到 LG G4 在百老匯、豐澤已經減至 $3098，不過就無電池送。
▲ 衛訊做到 HK$3098。
三星旗艦都有得減，細舖再劈四舊，抵唔抵?
Samsung S7 系列開賣至今已經接近兩個月，不過無論是大舖還是細舖，都未見減價，S7 大舖賣緊 $4698，而 S7 Edge 則賣緊 $5398。至於細舖 S7 就賣緊 $4480，S7 Edge 則為 $5280。雖然近日未有今代旗艦減價的消息，不過卻發現前代旗艦 S6 有平。而家想在大舖搵部 S6 番黎已經唔容易，好多分店都未必有貨，而最後售價為 $3998。不過如果真係想買 S6 的話，版主留意到，S6 最近細舖偷偷劈左 $400，賣 $3480，唔知大家覺得抵唔抵呢?
▲ 大舖賣緊 $3998，仲要唔係間間有貨。細舖 S6 本來賣緊 $3880，不過最近再偷偷減多四舊，即 $3480，呢個價，網友覺得抵唔抵?
Sony Xperia Z5 在文章發表時，大舖售價為 $4298，按這裡有詳細規格及最新賣價。
LG G4 在文章發表時，大舖售價為 $3098，按這裡有詳細規格及最新賣價。
Samsung Galaxy S6 在文章發表時，大舖售價為 $3998，按這裡有詳細規格及最新賣價。
