LG G5 劈千二都未到入手良機？
廢話都唔多講了，今次 LG G5 劈價，不論係衛訊、百老匯、豐澤、蘇寧，都做「即減 $1200」賣 $4498，而送的贈品都大同小異，都會有機套， 32GB SD 卡，電池要加錢換。所以邊間最抵，都好視乎舊機 trade in 價以及信用卡回贈有多少，呢點人人唔同所以版主都唔多講了。反而， $4498 呢個價是不是值得入手，有沒有更平的選擇才是大家想知的重點吧？接下來同大家講！首先講下現時有沒有更平的選擇，如果想用四千樓下的價錢入手 G5 的話，韓水會係一個不錯的選擇。之前同大家提過，而家 G5 韓手價大約 $4180 左右，到左今個星期，粉紅色版本 G5 價錢又再下跌，來到 $3980 呢個價位。雖然同大鋪價錢相距不遠，吸引力都無早排咁大，但都可以見到，水貨 G5 的價錢其實都仲有下調空間。
再講返行貨先。基本上 100 個網友裡面有 99 個都會話， LG G5 唔落到三字頭都唔叫抵玩，換句話說現時減完 $1200 賣緊 $4498 的 G5 都未係入手的時候。呢點其實相當正確，之前 CMHK 亦都為大家印證左， LG G5 可以落到 $3780 呢個價位（雖然只限上台客），而版主都聽聞，其實 LG G5 目前來貨價大約係 $3400 左右。所以之後大鋪會唔會再劈？版主都唔太肯定，但從以上資料可以見到，今次大鋪劈得咁狠，其實都係因為 G5 有一定的減價空間。亦因為咁，個人就不太認為短時間內會見到劈價戰了。
▲ LG G5 減完 $1200 之後，聽說銷情雖然無大爆發，但反應的確比之前好。
▲ CMHK 推出的優惠其實都證明到比大家睇， G5 劈價可以起到好盡，落到三千呢個價位都無難度。
LG G3 大鋪新低價！係最後入手機會？
相對 G5，其實 LG 前代旗艦 G3 口碑實在好得多。即使開賣至今，都差不多有兩年時間，版主間中都見到有人推介 G3 作為中低價位之選。之前 CMHK 忽然重開特賣場， LG G3 就係重點劈價款式之一，可惜而家已經無賣了。如果大家仍然想用平價入手 G3 的話，而家都仲有機會。現時百老匯同豐澤入手 LG G3 都有著數，但兩者又有少少不同。百老匯今次其實係信用卡優惠，要用指定信用卡才可以用 $2198 入手 G3。而豐澤就係即減價，不需要指定信用卡，但只會送芒貼一張。但從 CMHK 已經無再賣，以及大鋪部份分店已經無貨看來，有返咁上下年紀的 G3 看來都係最後一減了。唔知大家又覺得抵唔抵呢？留言講講吧！
▲ 其實 LG G3 都算係長壽機款，同期的旗艦到而家係大鋪都已經滅跡了。
在文章發佈時，LG G5 大舖賣價為 $4498，按此看詳細規格和最新賣價。
在文章發佈時， LG G3 大鋪賣價為 $2198 ，按此看詳細規格和最新賣價。
